Góðar göngur í Úlfarsá

Það eru góðar göngur í árnar á vesturlandi og veiðiperlur Reykjavíkur fara ekki varhluta af því.

Úlfarsá sem er oftar en ekki nefnd Korpa er oft í skugganum af Elliðaánum sem njóta mikillar hylli veiðimanna enda ekkert skrítið þar sem hún er bæði gjöful og þægilega veidd. Korpa er bara ekkert síður veiðin en í henni er aðeins veitt á tvær stangir og meðalveiðin verið um 150 laxar yfir tímabilið. Tímasetningin á göngunum í árnar tvær eru svipaðar og núna með auknum krafti laxgengdar í Elliðaárnar er laxinn mættur í Korpu.

Það var greinilega nokkur torfa sem synti um ósinn um helgina og það sást greinilega þegar laxinn renndi sér upp fossinn á flóðinu og þeir sem náðu ekki göngunni þá lágu í hylnum við órinn og stukku upp þennan rúma meter sem stökkið er. Það var mikið líf í Berghylnum og greinilegt að það var mikil sigling á laxinum því stöðugur straumur laxa sem stungu sér upp fossinn ofan Berghyls sýndi að þessir ætluðu sér ekki að liggja lengi í Berghyl. Laxinn er kominn um alla á og þeir sem hafa bókað sér daga í sumar eiga greinilega gott í vændum.