Porsche bætir við sig 3.000.000 nýrra „starfsmanna“ í formi býflugna

Porsche hefur bætt við sig 3.000.000 nýjrra „starfsmanna“ fyrir utan verksmiðjur sínar í Leipzig, en þessir starfsmenn eru hvorki doktorar í verkfræði né lærðir vélfræðingar, heldur býflugur.

Í fyrrasumar voru þessar býflugur í býflugnabúi Porsche 1,5 milljónir talsins og framleiddu 400 kíló af hunangi sem seldist reyndar upp á augabragði í versluninni sem tengist verksmiðjum Porsche í Leipzig. Porsche hefur því tvöfaldað „verkamannafjöldann“ á milli ára og stefnir að framleiðslu á 1.000 kílóum af hunangi í sumar.

Þessi starfsemi myndu margir halda að væri hreinn leikaraskapur hjá Porsche, en sannleikurinn er sá að þetta er samfélagsverkefni sem ætlað er að fjölga býflugum í Þýskalandi sem víða eiga undir högg að sækja. Um helmingur býflugnategunda í landinu flokkast undir það að vera í útrýmingarhættu.

Hunangið, sem er afrakstur þessarar ræktunar Porsche, er selt undir nafninu Turbienchen, sem gæti útlagst sem litlar túrbínur, en þannig mætti segja að býflugur hljómi einmitt. Nokkuð viðeigandi nafn það og tengir vöruna við hina söluvöru Porsche, það er bíla.