Ólst upp við það að maður geti eignast börn vandræðalaust

Einn af hverjum sex glímir við ófrjósemi hverju sinni en fjallað var um Tilvera, samtök gegn ófrjósemi, stendur nú í vikunni fyrir vitundarvakningu um málefnið. Í þættinum Íslandi í dag í gærkvöldi var fjallað um ófrjósemi.

Samtökin vilja vekja athygli á því að því miður geta ekki allir eignast barn án tækninnar.

„Það kom upp í hugann á manni að maður gæti jafnvel aldrei eignast börn og maður er í raun ekkert kunnugur þessum pakka því það er svo lítil umræða um þetta í þjóðfélaginu,“ segir Jóhanna Frímannsdóttir, sem er ein þeirra sem þekkir vel hversu erfitt það er að vera ein af hverri sex sem þráir að eignast barn en eiga í erfileikum með það.

„Maður elst í raun og veru upp við það að þegar maður ákveður að eignast börn, þá bara komi það vandræðalaust. Við förum í gegnum eina glasafrjóvgunarmeðferð og fáum strax jákvætt svar og það er ótrúlega mikill léttir. Eftirvænting og spenna einkenndi meðgönguna og pínulítill kvíði lika. Svo fékk maður sólargeislann í fangið og það var bara æðislegt.“

Rætt var við þrjár konur í þættinum í gær og má horfa á hann í heild sinni hér að neðan. Í vikunni verður sérstök áhersla lögð á ófrjósemi karla.