Sætur Daihatsu í Tokýó

Hver man ekki eftir Daihatsu Charade eða Rocky bílunum sem voru hér fjölmargir á götunum á árum áður? Daihatsu fyrirtækið er langt frá því dautt úr öllum æðum þó svo bílar þeirra séu ekki lengur til sölu hérlendis. Toyota á nú ráðandi hlut í Daihatsu og fyrirtækið sérhæfir sig áfram í framleiðslu á smáum og ódýrum bílum.

Ágætt dæmi um það er nýr bíll Daihatsu sem fyrirtækið ætlar að kynna seinna í mánuðinum á Tokyo Motor Show, en hann ber nafnið DN Compagno. Þessi smái bíll er með 1,0 lítra vél með forþjöppu, en mun einnig fást með 1,2 lítra vél með Hybrid kerfi.

Útlit bílsins minnir mjög á bíla sem framleiddir voru á sjöunda áratug síðustu aldar, en það á sko alls ekki við innréttinguna, sem er mjög nútímaleg með stórum stafrænum skjám og hlaðinn nýjustu tækni. Stýri bílsins er klætt leðri og saumað saman með rauðum þræði og ferlega sportlegt. Svona litlir bílar frá Daihatsu eru aðallega ætlaðir á heimamarkaði í Japan og lágverðssvæði, enda ódýrir mjög.