Sjóbirtingsveiðin gengur mjög vel fyrir austan

Sjóbirtingsveiðin stendur nú sem hæst á veiðislóðum birtingsins og það er óhætt að segja að veiðin gangi vel miðað við þær fréttir sem berast.

Það hefur verið afskaplega góð veiði á flestum svæðum sem við höfum frétt af en fréttir af veiði helgarinnar frá Vatnamótum og Grenlæk standa líklega upp úr.  Holl sem var við veiðar í Grenlæk frá föstudegi og fram á sunnudag lönduðu 51 sjóbirting og mikið af því vænn fiskur um 4-6 pund.  Mesta veiðin var í Flóðinu sjálfu en annars sást fiskur víða og það var mikið líf á svæðinu.  Holl sem var við veiðar í Vatnamótum á sama tíma gerði líka mjög gott mót en þeir fengu 31 birting og þar af nokkra sem voru 8-10 pund og þykkir eftir því.  Skilyrðin þar voru þó þau að erfitt var að ná flugu út í skilin þar sem litað vatn úr Skaftá liggur svo mikið af veiðinni kom á þunga spúna sem hægt var að kasta það langt að spúnninn náði að skilunum þar sem fiskurinn lá.  Mesta veiðin á eina stöng voru 18 fiskar og fyrir utan það sem var var landað duttu nokkrir af eins og gengur og gerist en miðað við hvað það var mikið líf á svæðinu eru næstu holl í góðum málum.