111 sm hængur úr Laxá í gær

Nessvæðið í Laxá í Aðaldal hefur gefið töluvert af 100 sm löxum í sumar og tíminn þessa dagana er einmitt talinn sá besti fyrir stóru hængana.

Í gærkvöldi bar heldur betur til tíðinda en þá landaði Árni Pétur Hilmarsson 111 sm hæng sem mældist 56 sm í ummál og lax af þessari stærðargráðu er á að giska um 30-33 pund.  Árni Pétur er þar með  kominn í 30 punda klúbbinn á Nesi en sá er allfámennari en 20 punda klúbburinn þar á bæ.  Laxinn tók á Skriðuflúð og flugan sem var undir var lítil Erling special.  Þrátt fyrir að heildarveiðin í Aðaldalnum sé heilt yfir í magni ekki góð bæta svona risalaxar heldur betur geð veiðimanna og á þessum fáu augnablikum sem eftir lifa tímabilsins í ánni er alltaf von á einum slíkum enda hafa fleiri svona höfðingjar sést í Laxá í sumar og á Nessvæðinu hafa nokkrir þeirra sýnt sig reglulega á legustöðunum svo það er vel vitað hvar þeir liggja.