Fínasta veiði í Apavatni

Apavatn hefur ekki oft verið nefnt á nafn sem vinsælt veiðivatn sem er eiginlega hálf skrítið því vatnið getur verið mjög gjöfult.

Í vatninu er urriði sem er yfirleitt um 1-3 pund en það hefur veiðst nokkuð af stærri fisk í sumar og til að mynda var veiðimaður þar fyrir tveimur dögum síðan með fallegan afla upp á níu fiska og voru þær frá þremur upp í fimm pund.  Við höfum fengið nokkrar ábendingar um góða veiðií vatninu í sumar og þá hefur að sama skapi aukist umferð veiðimanna við vatnið.  Fiskurinn virðist vera taka vel og eins og venjulega virðast ljósaskiptin á morgnana og kvöldin gefa best.

Í næsta nágrenni er svo Laugarvatn og veiðin þar í sumar hefur að sama skapi verið ágæt og þeir sem þekkja vatnið vel veiða auðvitað betur en aðrir.  Bleikjan í vatninu er feit og falleg en það er haft á orði að hún sé ein besta bleikjan sem hægt er að fá í matinn úr vötnunum á suðurlandi og hefur gnægð fæðuframboðs mikið um það að segja.  Hólaá hefur að sama skapi verið gjöful í sumar og þar hafa að venju veiðst nokkrir rígvænir urriðar en þeir sem þekkja Hólaá best segja að þar fari nú í gang skemmtilegasti tíminn í ánni.