Úkraínska lögreglan kaupir 635 Outlander PHEV

Stærstu einstöku kaup á tengiltvinnbílum voru gerð í Úkraínu um daginn þegar Mitsubishi afgreiddi lögregluna í Kiev með 635 bílum af Outlander PHEV gerð. Þessi kaup voru gerð í anda „Green Investment Scheme“, alþjóðlegrar samþykktar til umhverfisverndar.

Fyrir nokkrum árum afgreiddi Mitsubishi 507 eintök af litla rafmagnsbílnum i-MiEV til Eistlands undir sömu formerkjum. Þegar bílarnir voru afhentir voru viðstaddir forsætisráðherra Úkraínu og forstjóri Mitsubishi. Mitsubishi Outlander, sem framleiðsla hófst á árið 2013, hefur verið söluhæsti tengiltvinnbíllinn í Evrópu síðastliðin 4 ár samfellt og hafði selst samtals í 80.768 eintökum í lok árs í fyrra.

Í bílnum er 2,0 lítra bensínvél sem er 121 hestöfl, en þegar afl rafmagnsmótoranna er bætt við skilar hann 203 hestöflum. Hægt er að aka bílnum á rafmagninu eingöngu fyrstu 54 kílómetrana. Mitsubishi hefur nú þegar sýnt útlit næstu kynslóðar Outlander PHEV með tilraunabílnum GT-PHEV Concept, sem fyrirtækið sýndi á bílasýningunni í París fyrr á árinu.

Þessi nýja gerð fær stærri 2,5 lítra vél og stærri rafmagnsmótora, nú þrjá í stað tveggja, sem og stærri rafhlöður. Hann á að komast fyrstu 120 kílómetrana á rafmagninu eingöngu og hafa heildardrægni uppá hvorki meira né minna en 1.200 kílómetra með því bensíni sem á tank hans kemst. Ekki er ljóst hvenær þessi nýja gerð kemur á markað.