Leikmönnum, þjálfurum og öllum aðstandendum Vals var gróflega misboðið

Handknattleiksdeild Vals hefur sent frá sér fréttatilkynningu vegna dómgæslunnar í seinni leik liðsins í undanúrslitum Áskorendakeppni Evrópu.

Valsmenn mættu með átta marka forskot út til Rúmeníu en töpuðu seinni leiknum með níu mörkum og eru því úr leik.

Dómarar leiksins buðu upp á ansi skrautlega frammistöðu og leikmaður Vals hafði það eftir þjálfara rúmenska liðsins að þeim hafi verið mútað.

Stjórn handknattleiksdeildar Vals hefur nú sett málið í viðeigandi farveg í samstarfi við HSÍ og lögfræðing á vegum félagsins. Þar verður metið hvort Valsmenn kæra eða ekki.

„Leikmönnum, þjálfurum og öllum aðstandendum liðsins var gróflega misboðið og er það skylda okkar að láta í okkur heyra þegar slíkt á sér stað. Við hvetjum alla sem bera hag íþróttarinnar fyrir brjósti til að deila myndskeiðum úr leiknum og vekja þannig athygli á málinu á alþjóða vettvangi,“ segir meðal annars í þessari fréttatilkynningu en hana má lesa alla hér fyrir neðan.



Fréttatilkynning handknattleiksdeildar Vals vegna undanúrslita Áskorendakeppni Evrópu

Vegna umfjöllunar fjölmiðla og umræðu um skrautlegan undanúrslitaleik Vals og Potaissa Turda í Rúmeníu síðastliðinn sunnudag, vill stjórn handknattleiksdeildar Vals koma eftirfarandi á framfæri.

Stjórn handknattleiksdeildar Vals hefur sett málið í viðeigandi farveg í samstarfi við HSÍ og lögfræðing á vegum félagsins. Mun það nú verða skoðað af þar til bærum aðilum, en það er ljóst að félagið mun a.m.k. senda frá sér formlega kvörtun vegna þeirra aðstæðna sem liðinu voru skapaðar í Rúmeníu í umræddum leik. Hvort og með hvaða hætti kæra verður sett fram verður metið af aðilum sem hæfastir eru til slíks.

Leikmönnum, þjálfurum og öllum aðstandendum liðsins var gróflega misboðið og er það skylda okkar að láta í okkur heyra þegar slíkt á sér stað. Við hvetjum alla sem bera hag íþróttarinnar fyrir brjósti til að deila myndskeiðum úr leiknum og vekja þannig athygli á málinu á alþjóða vettvangi.

Að sama skapi er mikilvægt að leikmenn, þjálfarar og aðrir sem að liðinu standa fái nú tækifæri til að einblína á verkefnið hér heima, þar sem liðið er í baráttu í úrslitakeppni um Íslandsmeistaratitilinn.

F.h. stjórnar hkd Vals

Hörður Gunnarsson

Formaður