Stóraukin rafmagnsbílasala í Evrópu

Á fyrsta ársfjórðungi þessa árs jókst sala rafmagnsbíla, tengiltvinnbíla og Hybrid bíla í Evrópu um 37,6% og taldi samtals 212.945 bíla. Aukningin í rafmagnsbílum var 49% og 29,9% í tengiltvinnbílum. Þá jókst sala á Hybrid bílum, sem ekki eru tengjanlegir við rafmagn heldur enduheimta aðeins hemlunarorku, um 61,2% og er sala slíkra bíla enn meiri en rafmagnsbíla og tengiltvinnbíla samtals.

Aukning varð í hverju einasta landi Evrópusambandssvæðisins, mest þó á Spáni en þar varð 87% vöxtur. Vöxturinn var 67,5% í Þýskalandi, 29,9% í Bretlandi, 24,8% í Frakklandi og 17,2% á Ítalíu. Sala rafmagnsbíla jókst ekkert í Evrópu á síðasta ári þar sem kaupendur virtust bíða útkomu nýrra og langdrægnari gerða. Lítil aukning var á sölu tengiltvinnbíla, en nú í ár hefur vöxturinn verið mikill hvað báða flokka varðar.

Af einstaka rafmagnsbílum varð Renault Zoe söluhæstur í Evrópu á fyrsta ársfjórðungi þessa árs með 21.240 selda bíla. Næst mest seldist af Nissan Leaf (18.210) og Tesla Model S (11.564). Af tengiltvinnbílum seldist Mitsubishi Outlander PHEV best, eða í 21.318 eintökum og jókst sala hans um 32% á milli ára. Volkswagen Passat GTE varð sá næstsöluhæsti með 13.110 selda bíla og Volkswagen Golf kom þar næstur með 11.329 eintök seld.