MG rafmagnsbíll á 30.000 pund

Þennan rafmagnsbíl sýnir breski sportbílaframleiðandinn MG á bílasýningunni í Shanghai sem nú stendur yfir. Hann á að verða á afara samkeppnishæfu verði, eða 30.000 pund sem útleggst á 4,2 milljónir króna. Það verður að teljast hóflegt verð fyrir svo flottan bíl með 500 km drægni.

Það er ekki frá því að sjá megi stíliseringu frá Mazda, Mercedes Benz og Aston Martin bílum þegar augum er rennt yfir bílinn. Framljósin minna á nýlega bíla frá Mazda, framendinn á Mercedes Benz bíla og hliðarsvipurinn á Aston Martin. Alls ekki slæmur heildarsvipur, en útlitsþjófnaður er eitthvað sem ekki er hægt að verjast við að detta í hug.

Bíllinn er með vængjahurðum og glerþaki, eitthvað sem kostar yfireitt mikið í framleiðslu og því kemur það verð sem MG ætlar að bjóða þennan bíl á á óvart. Auk þess er innrétting bílsins afar ríkuleg og ef að MG tekst að bjóða svona bíl á þessu verði er ekki að spyrja að viljugum kaupendum.

Það er kínverski bílaframleiðandinn SAIC sem á nú MG og mun útvega fjármagnið til smíði þessa bíls, ef af verður, en hér fer þó aðeins hugmyndabíll, þó viljinn sé til hendi að framleiða hann. SAIC mun einmitt útvega rafmagnsdrifrás bílsins sem hefur drægni uppá 500 km og hraðar bílnum í hundraðið á minna en 4 sekúndum. MG og SAIC sýnir þennan bíl nú í Shanghai og ætla að sjá hver viðbrögðin verða áður en ákvörðun verður tekin um fjöldaframleiðslu hans. Vonandi að svo verði.