Fjölmennt en lítil veiði við Vífilstaðavatn

Fyrsti dagurinn á veiðitímabilinu rann upp í gær og það voru margir veiðimenn komnir af stað í morgun á veiðislóð.

Eitt af þeim vötnum sem opnar snemma er Vífilstaðavatn og þar var nokkuð fjölmennt í gærmorgun.  Fyrstu veiðimennirnir voru mættir fljótlega upp úr klukkan sjö og á suðurbakkanum var nokkuð þétt staðið hluta úr degi.  Það fór þó ekki mörgum fregnum af aflabrögðum en við höfum ekki frétt af nema einni bleikju sem kom á færið hjá veiðimanni seinni partinn í gær og var það mjög dæmigerð pundsbleikja úr vatninu.

Vífilstaðavatn er alltaf best í apríl og maí en veiðin dettur stundum mjög hratt niður í því um leið og vatnið hlýnar og sólskinsdögum fjölgar.  Það má þó nefna að þrátt fyrir að bleikjan hafi ekki viljað taka flugurnar hjá veiðimönnum var hún þó klárlega í einhverju æti því vakir sáust af og til en á þessum tíma er hún þó mest að éta púpur og kuðung við botninn þannig að vænlegast til árangurs á þessum árstíma er að veiða á langa granna tauma við botninn og draga löturhægt inn.