H&M byrjar með nýtt vörumerki

Tískurisinn H&M hefur tilkynnt að þau muni byrja með nýtt vörumerki sem ber nafnið Arket. Merkið mun selja lífstílsvörur sem og klassískar og tímalausar flíkur. Áætlað er að fyrsta búðin muni opna í London í haust. 

H&M rekur nú þegar & Other Stories, Weekday, Cheap Monday, Cos og Monki. Merkið mun einblína á skandinavískan stíl og verður meðal annars skandinavískt kaffihús inni í sumum verslununum. Lögð verður áhersla á tímalausa hönnun á bæði flíkum sem og lífstílsvörum og heimilisvörur.

Búðin mun einnig selja merki sem ekki eru tengd H&M keðjunni. Ekki er vitað hvað koma skal enda enn ekkert sýnishorn komið frá Arket. Verðbilið er heldur ekki vitað, þó hægt sé að gera ráð fyrir að það verði dýrara en H&M. Það er því ekki hægt að gera neitt annað en að bíða spenntur eftir myndum af fyrstu línunni sem kemur vonandi á næstu mánuðum.