Mikil fjölgun dauðaslysa á bandarískum vegum

Dauðaslysum í umferðinni í Bandaríkjunum hefur fjölgað um 14% á aðeins tveimur árum og er það mesta tveggja ára fjölgun frá árinu 1964. Ekki hafa orðið eins mörg dauðsföll í umferðinni í fyrra síðan árið 2007. Fjölgunin milli 2016 og 2015 nam 6%, en milli 2016 og 2014 nemur hún 14%.

Dauðsföll í umferðinni í fyrra voru rétt um 40.000. Árið 2014 voru dauðaslysin um 35.000 og því er fjölgunin til ársins í fyrra um 5.000 manns. Fyrir utan dauðsföllin í fyrra slösuðust 4,6 milljón manns í bandarísku umferðinni í fyrra og heildarkostnaður samfélagsins vegna þessara slysa er metinn á 432 milljarða bandaríkjadala, eða hátt í 50.000 milljarða króna.

Ein af meginástæðunum fyrir auknum dauðsföllum í umferðinni í Bandaríkjunum á síðustu tveimur árum er talin vera aukin símnotkun ökumanna í akstri. Aukin umferð vegna lágs olíuverðs telur einnig mikið hvað þessa fjölgun varðar.

Athyglivert er að bara saman fjölda banaslysa í umferðinni í Bandaríkjunum og hérlendis. Bandaríkjamenn eru rétt um þúsund sinnum fleiri en Íslendingar. Því mætti áætla að banaslys hérlendis væru 40 á ári ef sama hlutfall íbúa létust hér og vestra. Banaslysin hérlendis í fyrra voru 18 talsins og 16 árið 2015. Því eru banaslys í umferðinni hérlendis minna en helmingi fátíðari en í Bandaríkjunum, ef þessi reikniaðferð er notuð.