Volkswagen hættir við framleiðslu minni dísilvéla

Mikil umskipti urðu í stefnu Vokswagen í framleiðslu- og umhverfismálum í kjölfar dísilvélasvindlsins þarsíðasta haust. Framleiðsla fyrirtækisins hefur öll verið endurhugsuð með grænum formerkjum og aukinni rafmagnsvæðingu bíla þeirra.

Síðasta birtingarmynd þess er nýleg ákvörðun Volkswagen að hætta við nýsmíði 1,5 lítra dísilvélar sem leysa átti af hólmi núverandi 1,6 lítra dísilvél. Í staðinn verða þeir bílar sem vélin átti að fara í knúnir bensínvél með Hybrid-kerfi. Búast má við því að fleiri bílaframleiðendur feti í sömu spor hvað dísilvélar varðar og búast má við mjög hröðu undanhaldi hennar vegna aukinnar vitneskju um mikla mengun dísilvéla.

Það hjálpaði til við ákvörðun Volkswagen að mikill þróunarkostnaður fylgir sköpun nýrra véla og einnig að kostnaðurinn við mengunarvarnarbúnað sem búa þarf dísilvélar með í dag er líka dýr, eða á bilinu 600 til 800 evrur á hverja vél.

Volkswagen mun einnig hætta að framleiða 1,6 lítra dísilvélina eftir 3-4 ár og sama á við um 1,4 lítra dísilvélina. Því má segja að Volkswagen sé að hverfa frá öllum minni dísilvélum í sínum bílum. Það á þó ekki við 2,0 og 3,0 lítra dísilvélarnar sem virðast ætla að eiga lengra líf í bílum Volkswagen bílasamstæðunnar.