Mercedes Benz E-Class All Terrain gegn Audi A6 Allroad og Volvo V90 Cross Country

Mercedes Benz hefur stækkað E-Class línu sína og býður nú keppinaut gegn torfæruhæfu bílunum Audi A6 Allroad og Volvo V90 Cross Country. Bíllinn verður þó dýrari en þeir og mun kosta 58.101 evrur í Þýskalandi, en Audi Allroad kostar þar 55.800 evrur og Volvo V90 Cross Country 56.350 evrur.

Mercedes Benz E-Class All Terrain kostar 4.700 evrur meira en E-Class Estate langbakurinn. All Terrain útgáfan er 29 millimetrum hærri á vegi og kemur á loftpúðafjöðrun með þremur hæðarstillingum sem breytt getur veghæðinni um 35 millimetra. Veghæðin liggur á milli 121 og 156 millimetrum og því er ekki hægt að segja að mjög hátt sé undir bílinn, þó hann sé hæfari til utanvegaaksturs en hefðbundna langbaksgerð E-Class.

Sjálfskipting bílsins er með sérstaka stillingu fyrir utanvegaakstur. Hann fær auk þess hlífðarplötur að framan og aftan, auk plasthlífa umhverfis hjólskálarnar og fyrir vikið lítur bíllinn út fyrir að geta fremur átt við erfiðari færð. Hægt verður að fá 20 tommu felgur undir bílinn fyrir 714 evra aukagjald í stað hefðbundinna 19 tommu felga. Fjölarma 19 tommu felgur fást einnig gegn 238 evra aukagjaldi.