Allir bílar Bentley verða Plug-In-Hybrid

Forstjóri lúxusbílaframleiðandans Bentley, Wolfgang Duerheimer, greindi frá áformum fyrirtækisins að bjóða brátt allar sínar bílgerðir með rafmótorum auk bensínvéla, þ.e. sem Plug-In-Hybrid bíla. Þetta sagði hann á Automotive News World Congress í Detroit í Bandaríkjunum fyrir skömmu.

Fyrstur bíla Bentley til að fá rafmótora verður Bentayga jeppinn nýi sem fást mun þannig strax á næsta ári. Wolfgang Duerheimer segir að Plug-In-Hybrid tæknin sé afar hentug lausn fyrir bíla framtíðarinnar og hefur þá kosti að bjóða akstur eingöngu á rafmagni í borgum og notkun brunavélar fyrir akstur á lengri leiðum.

Það sé heppilegt í ljósi þess að í mörgum af borgum Evrópu og víðar verði mengandi akstur bíla bannaður eftir nokkur ár, en svo muni ekki verða í dreifðari byggðum og þar sé bensínvélin enn heppileg vegna langdrægni. Þetta eigi ekki síst við í Bandaríkjunum þar sem vegalengdir milli staða séu langar.

Næsti bíll á eftir Bentayga verður svo Bentley Continental GT sem fá mun V6 vél auk rafmótora. Með þeim drifbúnaði verður bíllinn ámóta öflugur og með núverandi V8 vél.