Lengri gerð SsangYong Tivoli á leiðinni

SsangYong, framleiðandi Tivoli, Korando og Rexton, hefur notið vaxandi velgengni í kröfuhörðum flokki jepplinga og jeppa. Rexton og Korando hafa verið lengi í framleiðslu og sá síðarnefndi allt frá árinu 1983. Nýir eigendur að SsangYong komu sterkir inn 2011 og stórefldu alla þróunar- og markaðsstarfsemi.

Tivoli jepplingurinn, sem kynntur var til sögunnar á síðasta ári, er einn afrakstur þessa. Hann vakti strax mikla athygli fyrir hönnun, vandaðan búnað og hagstætt verð og hefur náð mikilli sölu í Evrópu. Nýlega kom svo fram að SsangYong ætlaði sér að hefja sölu í Bandaríkjunum árið 2020.

Samkvæmt upplýsingum frá Bílabúð Benna, umboðsaðila SsangYong hér heima á Íslandi, er Tivoli líka að stimpla sig sterkt inn hjá íslenskum bílakaupendum. Þá nefna þeir að til marks um vaxandi velgengni hans á alþjóðavísu hafi Tivoli frá SsangYong nú tryggt sér sæti á lista yfir bíla sem tilnefndir eru til nafnbótarinnar „Bíll ársins 2017“.  Það hlýtur að teljast góður fyrirboði fyrir framtíð SsangYong. 

Stærri útgáfa af Tivoli, ​Tivoli XLV, er væntanlegur á næstunni hjá Bílabúð Benna og er hann með mun meira flutningsrými en hefðbundna gerð hans.