11 rándýrir sportbílar sonar forseta Miðbaugs-Gíneu gerðir upptækir í Sviss

Þeir voru ekki af ódýrari gerðinni sportbílarnir sem svissneska lögreglan gerði upptæka fyrir skömmu í Sviss, en þeir voru í eigu sonar einræðisherrans Teodoro Nguema Obiang Mangue í Afríkuríkinu Miðbaugs-Gíneu. Bílarnir voru 11 af tölu og meðal annars af gerðunum Bugatti Veyron, Koenigsegg One:1 og Lamborghini Veneno Roadster, en aðeins voru framleiddir 9 slíkir Lamborghini bílar.

Bílaflotinn hefur verið metinn að andvirði 900 milljóna og er það víst fremur varlega metið. Þetta er ekki í fyrsta skipti sem bílar í eigu sonarins hafa verið gerðir upptækir í öðrum löndum en heimalandinu. Árið 2011 voru aðrir 11 bílar gerðir upptækir í París og voru þeir meðal annars af gerðunum Maserati MC12, Porsche Carrera GT, Ferrari Enzo, Maybach, Rolls Royce Phantom, Ferrari 599 GTO og tveir Bugatti Veyron bílar.

Það er ekki víst að íbúum í Miðbaugs-Gíneu sé skemmt yfir öllum þessum bílaflota sem sonur einræðisherrans hefur fest kaup á fyrir ríkisfé. Lögreglan í Sviss gerði bílana nú upptæka vegna spillingarrannsóknar sem nú er í gangi gegn forseta Miðbaugs-Gíneu. Það er ekki að spyrja að einræðisherrunum í Afríku og spillingunni sem þeim fylgir.