Sportbílasala á undanhaldi vestanhafs

Svo virðist sem sportbílar eigi ekki uppá pallborðið hjá bandarískum bílakaupendum nú og sala þeirra flestra hefur fallið þrátt fyrir að bílasala hafið aukist að undanförnu í Bandaríkjunum. Stutt er síðan að hér var greint frá svo minnkandi sölu í Ford Mustang að Ford ákvað að stöðva framleiðslu hans í eina viku. Sala Mustang hefur minnkað um 9% í ár.

Ekki er mikið betri sögu að segja um bíla eins og Chevrolet Corvette og Porsche sportbíla, en sala þeirra hefur líka fallið. Ástæða þessa telja sumir að sé “Baby boom” kynslóðin sem er fædd milli 1946 og 1964, sem hefur verið helstu kaupendur sportbíla undanfarna áratugi, er farin að eldast hressilega og kaupir nú fremur aðra bíla en sportbíla.

Yngra fólk hafi ekki eins mikinn áhuga á slíkum bílum og þessi eldri kynslóð og velji sér fremur jepplinga og jeppa og það helst af öflugri og dýrari gerðinni. Þrátt fyrir þessa söluminnkun á Ford Mustang verður salan á honum í ár kringum 100.000 bílar, en fjórðungur þess hefur farið í bílaleigur eða til leigu hjá öðrum fyrirtækjum.

Á þessu ári eru 40% kaupenda á Mustang úr “Baby boom”-kynslóðinni, en var 50% árið 2013. Góðu fréttirnar fyrir Ford eru þær að nú er 22% kaupenda á þrítugs eða fertugsaldri, en þeir voru aðeins 15% kaupenda árið 2013. Sala á Chevrolet Camaro og Corvette hefur fallið um 11% og 14% á árinu. Sala á sportbílum Porsche hefur fallið um 8% í ár, en sala Macan sportjeppans hefur aukist um 30%.