Veiðisumarið yfir meðallagi

Nú eru aðeins nokkrir dagar eftir af veiðisumrinu sem verður líklega minnst sem stórlaxasumars.

Það hafa líklega sjaldan eða aldrei veiðst jafn margir laxar yfir 100 sm á einu sumri og hvað þá jafn stór lax og 120 sm úr Laxá í Aðaldal sem var stærsti laxinn í sumar.  Bráðabirgðaútreikningar á aflatölum sumarsins sýna að veiðin sé yfir meðalveiði og inná milli eru nokkrar veiðiár að eiga eitt af sínum bestu sumrum samanber Miðfjarðará.  Smálaxagöngur voru heldur rýrar í sumar en veiðitölum var almennt haldið uppi á góðum stórlaxagöngum.

Veiðinni lýkur í laxveiðiánum 20. október en það eru árnar þar sem veiði er haldið uppi með seiðasleppingum.  Veitt er til 30. október í nokkrum ánum þar sem kastað er fyrir sjóbirting. Bráðabirgðatölur yfir stangveiði á laxi sumarið 2016 sýna að alls veiddust um 53.600 laxar.  Í heild var fjöldi stangveiddra laxa um 27% yfir langtímameðaltali áranna 1974-2015 sem er 42.137 laxar. Veiðin 2016 var um 18.100 löxum minni en hún var 2015, þegar 71.708 laxar veiddust á stöng. Í tölum um heildarlaxveiði eru þeir laxar sem upprunnir eru úr sleppingum gönguseiða og einnig þeir laxar sem er sleppt aftur í stangveiði  (veitt og sleppt).  Laxveiðin sumarið 2016 fór almennt vel af stað var góð veiði af stórlaxi (laxi tvö ár í sjó).  Smálaxagöngur sumarsins voru hinsvegar með minna móti og því dró víða úr veiði þegar líða tók á sumarið.