Geely stofnar nýtt bílamerki

Kínverski bílaframleiðandinn Geely, sem er einnig eigandi Volvo, mun í enda þessarar viku kynna nýtt bílamerki sem bera mun nafnið Lynk & Co. Bílar undir þessu nýja merki verða með undirvagn sem þróaður er af Volvo (Compact Modular Architecture). Meiningin er að bílar Lynk & Co verði í fyrstu seldir í Kína en svo síðar einnig í Evrópu og Bandaríkjunum.

Ekki er enn ljóst hvenær bílar Lynk & Co muni fara að sjást á götunum, en bílar Volvo með sama undirvagni munu þó fyrst streyma útúr verksmiðjum Volvo. Þennan nýja undirvagn kynnti Volvo fyrir um einu ári síðan og líklega verður fyrsti bíll Volvo með honum XC40 jepplingurinn af árgerð 2017.

Haft var eftir einum forsvarsmanni Lynk & Co að bílar fyrirtækisins verði best “tengdu” bílar heims og þá að líkindum átt við tengingar við umheiminn, svo sem í formi leiðsögukerfa, veraldarvefsins, afþreyingarkerfa og alls þess sem tengja má bíl við. Hvað útlit Lynk & Co. bíla varðar er sagt að þeir verði hannaðir með innblástri frá Concept 40.1 og 40.2 tilraunabílunum sem Volvo kynnti í maí síðastliðnum.