Bókunum fækkar vegna hryðjuverka í Evrópu

Ferðabókunum til landa á borð við Tyrkland og Frakkland, sem hafa lent í hryðjuverkaárásum á síðastliðnu ári, fer verulega fækkandi.

BBC greinir frá því að spáð sé að bókanir til Tyrklands milli september og desember á árinu verði 52 prósentum færri en á sama tímabili árið áður. Því er spáð að á sama tímabili muni bókunum til Frakklands fækka um tuttugu prósent.

Rannsóknir benda til þess að ferðamenn sæki til Spánar, Ítalíu og Portúgals í stað Tyrklands og Frakklands. Á fyrstu sjö mánuðum ársins fjölgaði flugsætum frá Bretlandi til Spánar um 19 prósent samanborið við sama tímabil árið áður, og um tólf prósent til Portúgals.

Erlendum farþegum hefur fækkað um 5,4 prósent í Frakklandi milli ára, og um 7,5 prósent í París, þar sem hryðjuverkaárásir voru gerðar bæði í janúar og nóvember árið 2015. Bókunum til Tyrklands hefur fækkað um fimmtán prósent milli ára vegna nokkurra hryðjuverkaárása og tilraunar til valdaráns.

Á hinn bóginn virðast ferðamenn vera að leita til Túnis aftur eftir að alþjóðlegum farþegum fækkaði um 39,4 prósent á síðasta ári í kjölfar mannskæðra hryðjuverkaárása þar.

Fréttin birtist fyrst í Fréttablaðinu