Svona var stemmningin þegar Danir urðu Ólympíumeistarar | Myndir

Guðmundur Guðmundsson leggst á koddann í kvöld sem nýkrýndur Ólympíumeistari.

Lærisveinar hans í danska handboltalandsliðinu unnu frækinn tveggja marka sigur, 28-26, á Frökkum í dag og tryggðu sér þar með sitt fyrsta Ólympíugull.

Guðmundur hefur því náð í bæði gull og silfur á Ólympíuleikum en íslenska landsliðið endaði í 2. sæti á Ólympíuleikunum í Peking 2008 undir hans stjórn.

Danir fögnuðu vel og innilega eftir að lokaflautið gall enda búnir að leggja ríkjandi Ólympíu- og Evrópumeistara að velli. Danska liðið spilaði einstaklega vel í leiknum og var greinilega mjög vel undirbúið.

Anton Brink, ljósmyndari Fréttablaðsins og Vísis, var í Future Arena í Ríó í dag og fangaði stemmninguna eins og sjá má á myndunum hér að ofan.