Saleen Automotive berst fyrir lífi sínu

Saleen Automotive, sem er breytingafyrirtæki sem gert hefur Ford bíla aflmeiri og breytt þeim útlitslega einnig, á nú í miklum fjárhagserfiðleikum og á erfitt með að afgreiða þær pantanir sem berast frá söluumboðum Ford í Bandaríkjunum. Skuldir hafa hlaðist upp á undanförnum árum hjá Saleen Automotive sem komið hefur niður á afkastagetu þess og tímasetningar standast engan veginn á afgreiðslu framleiðslu þess.

Dæmi eru um að afgreiðsla hafa dregist í allt að 12 mánuði og eru margir söluaðilar Ford bíla vestanhafs mjög pirraðir á þessum töfum. Auk þess hefur Saleen dregið úr framleiðsluframboði sínu og hefur ekki afgreitt bíla eins og þeir voru pantaðir og fyrir vikið afhent þá langt frá því sem auglýst var hjá Saleen og kaupendur þeirra því ekki ánægðir.

Forstjóri Saleen segir að hluti af ástæðunni fyrir öllum þessum töfum og vangetu fyrirtækisins að afgreiða bíla eins og þeir voru pantaðir sé vegna mikillar eftirspurnar eftir breyttum Ford bílum hjá Saleen. Staðreyndin er nú samt sú að frá árinu 2011 hefur Saleen tapað 30 milljónum dollara, eða 3,7 milljörðum króna og hefur ekki hagnast neitt árið síðan þá, að undanskildi árinu 2014. Saleen tapaði til að mynda 11,1 milljón dollurum á síðasta ári og það rímar tæplega við mikla eftirspurn eftir vörum fyrirtækisins.