Flottasta flíkin á Evrópumótinu er í eigu móður Arons Einars

Jóna Emilia Arnórsdóttir, móðir landsliðsfyrirliðans Arons Einars Gunnarssonar, hefur tröllatrú á strákunum okkar. Hún var klædd í glæsilegt blátt vesti, að sjálfsögðu númer 17, sem stórvinkona hennar Birna Björnsdóttir prjónaði.

„Maður er farinn að fá svolítinn hnút í magann. Maður er svo rosalega stoltur, ekki bara af honum heldur öllum strákunum,“ segir Jóna sem var á vappi með fjölskyldunni í miðbæ Saint-Étienne í hádeginu.

„Ég veit ekki hvenrig þetta verður í kvöld þegar þeir koma inn á völlinn. Maður er búinn að upplifa þetta í Hollandi, þegar þeir unnu Holland, maður ímyndar sér að þetta verði ennþá stærra. Tala ekki um ef þeir vinna,“ segir Jóna sem myndi þó alveg sætta sig við jafntefli. Hún er bjartsýn.

„Ég held að þeir komi til með að vanmeta okkur. Ég hef fulla trú á því.“

Aron Einar hefur verið fyrirliði landsliðsins undanfarin fimm ár eða síðan Lars Lagerbäck tók við liðinu. 

„Hann er dálítið stjórnsamur en á réttan hátt. Hann er bara leiðtogi og hefur alltaf verið það,“ segir Jóna sem hitti Aron Einar í fyrradag en hún dvelur í húsi í Annecy, sama bæ og strákarnir okkar hafa aðsetur í hér í Frakklandi.

„Hann var bara hress og kátur.“