Fiat Toro pallbíll

Þessi Fiat Toro pallbíll sást um daginn á götum Detroit í Bandaríkjunum. Hann er nú þegar í sölu í Brasilíu. Hvort tilkoma hans við prófanir í Bandaríkjunum bendi til þess að hann sé væntanlegur þangað í sölu eða víðar í heiminum skal ósagt látið.

Þessi bíll er byggður á Jeep Cherokee og er eiginlega pallbílsgerð hans, en Fiat Chrysler bílafyrirtækið á Jeep. Í Brasilíu er þessi pallbíll í boði með 140 hestafla og 1,8 lítra bensínvél eða 170 hestafla og 2,0 lítra dísilvél og fæst bæði fjórhjóladrifinn og framhjóladrifinn. Pallurinn á bílnum opnast með tveimur hurðum að aftan og er slíkt fyrirkomulag sjaldgæft.

Ef hann yrði seldur vestanhafs myndi hann keppa við bíla eins og Chevrolet Colorado/GMC Canyon, Toyota Tacoma og Honda Ridgeline. Þá myndi hann líklega fá sömu 271 hestafla 3,2 lítra V6 vélina og er að finna í Jeep Cherokee og með 9 gíra sjálfskiptingu.

Fiat hefur áður gefið það upp að með tilkomu nýrrar kynslóðar Jeep Cherokee árið 2020 verði einnig í boði pallbílsútgáfa af honum, en spurningin er hvort þessi verði fyrri til frá Fiat Chrysler.