BL söluhæsta bílaumboðið

Af heildarbílasölu febrúarmánaðar var BL með hæstu markaðshlutdeild eða 30,8% og er fyrirtækið jafnframt söluhæst það sem af er árinu með 28% hlutdeild og 702 selda bíla. Næst á eftir kemur Toyota með 19% og 476 selda bíla og í þriðja sæti er Hekla með 15,6% hlutdeild og 392 nýja bíla selda.

Heildarbílasala það sem af er árinu hefur aukist um 71% samanborið við sama tímabil í fyrra eða úr 1.473 bílum í fyrra í 2.507 í ár sem skiptist í 1.615 nýja bíla til einstaklinga og fyrirtækja en 892 nýja bíla í bílaleigur. 

Söluaukningin í liðnum febrúar heldur í við aukninguna það sem af er ári þrátt fyrir að bílaleigur hafi keypt færri bíla í febrúar því sala til einstaklinga og fyrirtækja jókst á móti. Í nýliðnum febrúar keyptu einstaklingar og fyrirtæki 788 nýja bíla en bílaleigur 397 bíla.

Fyrirtækin endurnýja

Skipting sölu milli gerða og stærðarflokka er svipuð milli ára og eru jepplingar og minni fólksbílar vinsælastir meðal fjölskyldna og einstaklinga. Greinilegt er að mörg fyrirtæki eru komin á leiðarenda með gamla bíla í rekstri og sést það á mikilli endurnýjun sendiferðabíla sem jafnframt eru vinsælir meðal bílaleiga sem sérhæfa sig í bílaleigubílum með innréttingum og svefnplássi. Í febrúar var BL með rúmlega fjörtutíu prósenta markaðshlutdeild á sendibílamarkaðnum.

Fleiri rafbílalausnir hjá BL

Talsvert hefur verið um kynningar á nýjum bílum það sem af er árinu og mun BL til að mynda kynna fjóra nýja bíla á næstu vikum. Nýr og algerlega endurhannaður Nissan Navara pallbíll verður kynntur á næstunni, en meðal staðalbúnaðar í honum er t.d. sjálfstæð gormafjörðun af aftan. Hann var kosinn pallbíll ársins 2016 í sínum flokki meðal evrópskra bílablaðamanna. 



Í lok mars verður nýr og breyttur Renault Megane kynntur og í rafbílalausnum sem sífellt fleiri skoða sem áhugaverðan kost ber tvo bíla hæst hjá BL; nýr BMW X5 tengitvinnbíl og Nissan Leaf með 30kW rafhlöðu sem hefur meiri drægni en nokkur annar rafbíll í þessum stærðarflokki. Ekki er ólíklegt að fleiri rafbílar verði kynntir á árinu en þessir tveir sem hér voru nefndir.