Breytingar í atvinnubíladeild Mercedes Benz

Breytingar hafa orðið í söludeild Mercedes-Benz atvinnubíla hjá Bílaumboðinu Öskju sem miða að því að stækka og efla deildina enn frekar. Mercedes-Benz er stærsti framleiðandi lúxus- og atvinnubíla í heiminum og hér á landi hefur sala atvinnubíla frá framleiðandanum verið mjög mikil undanfarin ár.

Nýr sölustjóri atvinnubíla er Finnbogi Óskar Ómarsson en hann kemur úr hópbifreiðageiranum. Hann býr að þekkingu og reynslu úr greininni og starfaði sem rekstrarstjóri SBA – Norðurleið frá 2008 til 2015 og síðast sem verkefnastjóri hjá Kynnisferðum. Finnbogi er einnig í MBA námi við Háskóla Íslands.

Tveir nýir starfsmenn söludeildar atvinnubíla eru Eiríkur Þór Eiríksson og Sigurður Einar Steinsson. Eiríkur Þór er nýr sölumaður vöru- og dráttarbíla. Hann kemur með mikla reynslu og þekkingu sem skilar sér til viðskiptavina deildarinnar. Eiríkur starfaði um nokkurra ára skeið sem bílstjóri við vöru- og farþegarflutninga en lengst af rak hann tölvuþjónustuna Securstore.

Sigurður Einar býr að 30 ára reynslu úr hópferðageiranum en hann starfaði fyrst hjá SBS á Selfossi og nú síðast hjá Kynnisferðum. Samhliða þessum störfum hefur hann verið ökukennari á hópbifreiðar hjá Ökuskólanum í Mjódd síðan 1993.

Undanfarin ár hafa umsvif tengd hópbifreiðum aukist mikið samhliða aukinni ferðaþjónustu, enda hafa Mercedes-Benz hópbifreiðar verið mjög vinsælar í þeim geira. Reiknað er með frekari vexti ferðaþjónustunnar og samhliða þeirri þróun hefur verið ákveðið að bæta við sölumanni í atvinnubíladeild Mercedes-Benz sem sérhæfir sig í sölu hópferðabíla.

Agnar Daníelsson og Páll H. Halldórsson hafa látið af störfum í atvinnubíladeild Mercedes-Benz og ákveðið að snúa sér að nýjum verkefnum. Agnar var áður sölustjóri deildarinnar og Páll sölustjóri vörubíla og eiga þeir stóran þátt í uppbyggingu deildarinnar. Söludeild atvinnubíla hefur vaxið mikið undanfarin ár samhliða auknum umsvifum í atvinnulífinu og hafa bæði Agnar og Páll, ásamt öflugum hópi samstarfsfélaga stuðlað að því.