BMW 8 kemur 2020

Þrátt fyrir að í vopnabúri BMW sé hinn nýi og gríðargóði BMW 7 ætlar fyrirtækið að smíða enn stærri fólksbíl sem enn meira verður lagt í og mun hann fá nafnið BMW 8.

Þetta gerir BMW vegna þess að BMW 7 hefur ekki náð að keppa við Mercedes Benz S-Class bílinn, en sá bíll hefur selst í mun meira magni en BMW og Audi A8, sem einnig er að svipaðri stærð og í lúxusbílaflokki.

Annað sem hefur áhrif á ákvörðun BMW að smíða BMW 8 er að hagnaður af smíða svona stórra og dýrra lúxusbíla er mikill og almennt hærri en af minni bílum lúxusbílaframleiðendanna.

BMW ætlar að bjóða tvær gerðir af BMW 8, báðar með coupe lagi, en aðra fjögurra hurða en hina tveggja hurða og verður sú útgáfa hans einnig í boði sem blæjubíll. BMW stefnir að því að sýna tilraunaútgáfu þessa bíls árið 2018 og setja hann síðan á markað árið 2020.

Bíllinn mun fá sama undirvagn og BMW 7 en verða örlítið stærri og kosta nokkru minna en Rolls Royce Ghost, en Rolls Royce er jú í eigu BMW. Verð þessa bíls verður líklega eitthvað yfir 100.000 dollurum, eða ríflega 13 milljónir.