Fimm bestu Super Bowl auglýsingar allra tíma

Nú styttist óðum í einn stærsta íþrótta- og sjónvarpsviðburð ársins þegar Carolina Panthers og Denver Broncos mætast í úrslitaleik NFL-deildarinnar, Super Bowl.

Super Bowl snýst þó ekki bara um viðureign bestu liðanna í NFL. Tónlistarmenn keppast um að fá að spila í hálfleik og fyrirtæki borga milljarða fyrir að fá að auglýsa í hléum. Margir bíða með óþreyju yfir því að sjá auglýsingarnar og sumar þeirra hafa orðið algjörlega ódauðlegar í annálum auglýsingaheimsins.

Apple - 1984

Þessi auglýsing olli straumhvörfum í auglýsingaheiminum. Fáheyrt var að svo mikið væri lagt í auglýsingu en hún var rándýr og í leikstjórn leikstjórans fræga Ridley Scott. Auglýsingin hermir eftir 1984 eftir George Orwell og er ansi merkileg fyrir þær sakir að í henni sést ekki einu sinni í eina einustu Apple-vöru.

 

1979 - Coca Cola

Coca Cola leggur gjarnan töluverðan pening í Super Bowl auglýsingar en frægasta auglýsing þeirra er væntanlega sú sem birtist árið 1979. Sumir segja að hún sé sú besta sem nokkru sinni hafi verið framleidd en boðskapurinn er í það minnsta fallegur.

1993 - McDonalds

Larry Bird og Michael Jordan keppa um Big Mac í skotkeppni. Þarf að segja meira?

Pepsi - 1996

Pepsi og Coca Cola hafa í gegnum tíðina verið í harðri samkeppni og þar eru Super Bowl auglýsingar engin undantekning. Þessi Pepsi-auglýsing segir frá Coca Cola-sölumanni sem freistast til þess að prófa Pepsi með klikkuðum afleiðingum.

2011 - Volkswagen

Áður en að Volswagen-skandallinn fór illa með Volkswagen vörumerkið vakti þessi auglýsing mikla athygli árið 2011 þegar afar krúttlegur lítill Darth Vader reynir að nota The Force til þess að hreyfa hluti.