Íslandsvinur í auglýsingaherferð Marc Jacobs

Fatahönnuðurinn Marc Jacobs birti í gær á Instagram-síðu sinni fyrstu myndina í auglýsingaherferð sinni fyrir vor og sumarlínuna 2016.

Myndina prýðir transkonan Lana Wachowski, en hún er þekktust fyrir að leikstýra kvikyndunum The Matrix og Cloud Atlas ásamt bróður sínum Andy.

Lana kom til Íslands í fyrra þar sem þættirnir Sense8, í hennar leikstjórn, voru teknir upp hér á landi, og því leyfum við okkur að titla hana sem Íslandsvin.

Það sem gerir þessa auglýsingaherferð frábrugðna fyrri herferðum fyrirtækisins, er að Jacobs fær mismunandi einstaklinga til þess að sitja fyrir, en ekki eingöngu fyrirsætur.

„Þetta er mín persónulega dagbók af fólki sem hefur haft áhrif á mig og veitt mér innblástur. Við blöndum saman tísku og þeirra persónueinkennum og þannig föngum við þeirra anda, fegurð og jafnrétti,“ segir Jacobs.