Tryggingasvikari sem ók Bugatti Veyron út í stöðuvatn fékk 1 árs dóm

Fyrir nokkrum árum síðan ók Andy House rándýrun Bugatti Veyron bíl sínum rakleiðis útí stöðuvatn í Texas fylki í Bandaríkjunum. Það gerði hann til að svíkja út tryggingar, en bíllinn var tryggður fyrir 2,2 milljónir dollara þó svo Andy hafi keypt hann fyrir 1,0 milljón dollara.

Andy House bar því við er hann var spurður af hverju bíllinn endaði úti vatninu að hann hafi verið að forðast pelíkana á lágflugi. Því miður fyrir þennan óheppna eða klaufska svikara þá náðust myndir af athæfi hans. Þar sést að engir pelíkanar, né aðrir fuglar, voru nálægt bílnum heldur ekur hann greinilega viljandi beint útí vatnið.

Fyrir þessa tilraun til að svíkja út peninga frá tryggingafélagi sínu hefur Andy nú verið dæmdur til eins árs fangelsinsvistar og eftir að henni líkur þarf hann að sæta eftirliti næstu 3 árin. Auk þess þarf hann að borga tryggingafélaginu 600.000 dollara., Hann er líka einum Bugatti Veyron fátækari.

Í myndskeiðinu hér að ofan sést er Andy House ekur bílnum viljandi í stöðuvatnið. Þetta myndskeið sannaði sekt hans.