Þrír efstir á Bahamaeyjum | Spieth fór holu í höggi

Þrír deila efsta sætinu eftir fyrsta hring á Hero World Challenge sem fram fer á Bahamaeyjum en Paul Casey, Jimmy Walker og Open meistarinn Zach Johnson léku allir á sex undir pari.

Jordan Spieth stal þó athyglinni með því að fara holu í höggi á annarri holu sem er 170 metrar á lengd en hann fékk ekki skolla á fyrsta hring og er einu höggi á eftir efstu mönnum á fimm undir pari.

Bubba Watson, Bill Haas, Brooks Koepka og Adam Scott eru einnig á fimm undir pari eftir fyrsta hring en skor keppenda var afar gott og sá eini sem lék ekki undir pari var Japaninn Hideki Matsuyama.

Aðeins 18 kylfingar fá þátttökurétt á þessu einstaka móti sem Tiger Woods heldur árlega í samstarfi við PGA-mótaröðina.

Annar hringur verður spilaður í kvöld en hann verður í beinni útsendingu á Golfstöðinni frá klukkan 18:00.