Tillaga Íslands samþykkt einróma á þingi IHF

Þing Alþjóðahandknattleikssambandsins var haldið í Sochi í Rússlandi nú um helgina og fulltrúar Íslands á staðnum fengu þingið til að samþykkja lagabreytingartillögu frá Íslandi.

Guðmundur B. Ólafsson formaður HSÍ og Davíð B. Gíslason varaformaður HSÍ sátu þingið fyrir hönd Handknattleikssambands Íslands en þar voru tekin fyrir hefðbundin aðalfundastörf IHF eins og ávallt er gert á tveggja ára fresti.

Meðal annars eru teknar fyrir tillögur frá álfusamböndum eins og Handknattleikssambands Evrópu (EHF) en einnig má bera fram tillögur einstakra sérsambanda líkt og HSÍ í þessu tilfelli.

„Í ljósi atburða í aðdraganda síðustu heimsmeistarakeppni (HM í Katar 2015) og gagnrýni HSÍ á huglæga ákvarðanatöku IHF við val á þátttökuþjóðum í HM í Katar, lagði HSÍ fram breytingartillögur á aðalreglum IHF í því skyni að tryggja að ákvarðanir IHF verði teknar af hlutlægum sjónarmiðum og ekki væri hægt að breyta reglum eftir að keppni væri hafin. Þessar breytingar voru samþykktar af þingfulltrúum IHF einróma," segir í frétt á heimasíðu HSÍ.

Guðmundur B. Ólafsson, formaður HSÍ, sagði í samtalið við heimasíðu HSÍ að hér sé um mikla breytingu á lögum IHF að ræða. „Með þessum breytingartillögum var verið að fylgja eftir sjónarmiðum HSÍ í þeim ágreiningi sem sambandið átti í við IHF fyrir HM í Katar og með samþykkt þeirra teljum við að komið sé í veg fyrir geðþóttaákvarðanir við val á þátttökuþjóðum í heimsmeistarakeppni," sagði Guðmundur í fréttinni á hsi.is.

Það var þó ekki hundrað prósent árangur hjá íslensku sendinefndinni því hin tillaga Handknattleikssambands Íslands var felld.

„HSÍ lagði jafnframt fram tillögu fyrir þingið um að ekki væri hægt að meina liði þátttöku frá HM vegna getamunar, eftir að það hafi tryggt sér þátttökurétt skv. reglum IHF. Þessi tillaga mætti andstöðu stjórnar IHF með þeim rökum að þeir vildu geta tryggt gæði leikja á HM og var þessi tillaga því felld eftir þó nokkrar umræður," segir í fréttinni á hsi.is.