Aron: Erum að fá tvo nýja varnarmenn út úr þessu móti

Það var nokkuð gott hljóð í Aroni Kristjánssyni, þjálfara íslenska handboltalandsliðsins, þegar Vísir heyrði í honum í kvöld þrátt fyrir átta marka tap á móti Dönum.

Íslenska liðið vann flotta sigra á móti Noregi og Frakklandi í fyrstu tveimur leikjunum en virtist ekki eiga mikið eftir á tanknum í lokaleiknum á móti Guðmundi Guðmundssyni og lærisveinum hans í danska landsliðinu. Danir tryggðu sér öruggan sigur á mótinu með sigrinum en íslensku strákarnir enduðu í öðru sæti.

„Það var ekki mikið eftir á tanknum þegar við byrjuðum leikinn við Dani og þessi slæma byrjun endurspeglast svolítið í því," sagði Aron en íslenska liðið missti Danina frá sér í upphafi leik.

„Menn voru með þunga fætur í byrjun og þá gerist allt hægt. Við vorum að tapa hlutunum í vörninni sem við vorum ekki að gera í hinum tveimur leikjunum. Við vorum líka að klúðra nokkrum dauðafærum í sókninni og vorum bara ekki nægjanlega beittir," sagði Aron.

„Við lendum í þessu "sjokk-starti" en það var sterkur karakter hjá strákunum að koma til baka og gera þetta að leik. Í lokin voru nokkrir orðni vel laskaðir og þá lá þetta svolítið á herðum ungra og óreyndari manna að koma með eitthvað," sagði Aron.

„Það tekur smá tíma að skóla þessa stráka og við verðum bara að halda áfram grimmt að vinna í því að auka breiddina sóknarlega," sagði Aron en hann var ánægður með hvernig þeir Tandri Már Konráðsson og Guðmundur Hólmar Helgason stóðu sig í miðri íslensku vörninni.

„Mér finnst aftur á móti við vera að fá tvo nýja varnarmenn út úr þessu móti, Tandra og Guðmund Hólmar," sagði Aron.

„Miðað við þá stöðu sem við komum í hingað út. Það var engin fyrirvari á þessum brottföllum í miðjuvörninni og því var það mjög sterkt að ná að púsla því saman," sagði Aron. „Þetta hafðist með mikilli vinnu og svo eru þetta skynsamir drengir sem komu inn. Þeir voru fljótir að ná hlutunum og því var hægt að ná góðri frammistöðu í fyrstu tveimur leikjunum," sagði Aron.

„Í lokaleiknum í dag var búið að vera mikið álag á mönnum og liðið búið að spila þrjá leiki á fjórum dögum. Við vorum í mjög erfiðum leik í gær á móti Frökkum. Danir náðu að dreifa álaginu meira og skipta meira inná hjá sér. Þeir voru því með ferskari menn enda með alveg gríðarlega breidd," sagði Aron.

„Útkoman á þessu móti er fína þótt að við séum óánægðir með byrjunina á þessum leik í kvöld sem og með lokin á leiknum. Mótið í heild sinni var fínt," sagði Aron nokkuð sáttur með stöðu mála hjá íslenska landsliðinu nú þegar tveir mánuðir eru þangað til að Evrópumótið í Póllandi hefjist.

Aron segir að afrekshópurinn sé þegar farinn að skila sínu í sambandið við það hversu vel gekk hjá þeim Tandra Má og Guðmundi Hólmari að koma inn í þetta.

„Það má segja að þarna sé afrekshópsvinnan svolítið að skila okkur með Guðmund Hólmar. Tandri fékk líka fimm til sex vikur síðasta sumar með afrekshópnum. Guðmundur Hólmar var í þeim pakka líka og hefur líka verið með á þessum æfingum í vetur.  Hann er búinn að vera mjög duglegur að mæta og er því inn í hlutunum.  Þess vegna var stökkið ekki eins stórt fyrir hann eins og fyrir Pétur Júníusson sem hefur ekki getað tekið mikið þátt,“ sagði Aron.

„Það er klárlega hægt að byggja ofan á þetta,“ sagði Aron og játar það fúslega að það verði mikið að gera hjá honum að slípa liðið saman tvo síðustu mánuðina fram að Evrópumóti.