Ferrari eykur framleiðsluna um 30%

Ítalski sportbílaframleiðandinn Ferrari hefur á undanförnum árum takmarkað framleiðslu sína til að halda uppi verði og eftirspurn eftir bílunum. Framleiðslan undanfarin ár hefur verið takmörkuð við um 7.000 bíla, en nú hefur verið ákveðið að auka framleiðsluna í 9.000 bíla hægt og rólega fram til ársins 2019, eða um 30%.

Forstjóri Ferrari til margra ára var Luca di Montezemolo, en hann lét af störfum sem forstjóri fyrir um ári síðan. Ástæða uppsagnar hans voru deilur við forstjóra Fiat/Chrysler, Sergio Marchionne, en Ferrari hefur í langan tíma verið í eigu Fiat. Þessar deilur snéru ekki síst að framleiðslumagni Ferrari og vildi Luca aðeins framleiða 7.000 bíla á ári en Sergio 10.000 bíla.

Nú þegar Sergio Marchionne hefur einnig tekið við stjórnartaumunum á Ferrari er því ekki nema von að framleiðslan verði aukin. Með því ætlar hann að auka hagnað Ferrari og taka sénsinn á því að heimsmarkaðurinn gleypi við 10.000 bílum á ári án þess að skerða ímynd Ferrari. Undir stjórn Sergi Marchionne mun Ferrari kynna nýjan bíla á hverju ári a.m.k. fram til ársins 2018 og verður síaukin notkun áls í þeim bílum.