Stjörnusprengja á Íslandi

Fréttir um að kanadíski poppprinsinn Justin Bieber sé á landinu hafa farið sem eldur í sinu um samfélagsmiðlana og hafa myndirnar talað sínu máli.

Sást kappinn fyrst í Reykjanesbæ um hádegið í gær, þar sem hann gæddi sér á kalkúnabringubát frá Subway og smellti af sér sjálfu við sjávarsíðuna með vinum.

Þar bað hann aðdáendur jafnframt um að slaka á myndatökunum. Næst fréttist af kappanum á Reykjanesbrautinni með þeim afleiðingum að hann var eltur alla leið á Selfoss, þar sem prinsinn stoppaði á Olís og brá sér þar á salernið, meðan lífverðirnir bægðu myndasjúkum frá.

Smelltu starfsmenn myndum af klósettinu, sem var skilið eftir opið, og settu á netið. Sú frétt var jafnframt einhver sú mest lesna á Vísi í gær. 

Sjá meira: Bieber notaði almenningssalerni á Selfossi: Stefnir á gullna hringinn 

Bieber gaf að lokinni salernisferð færi á myndatöku, gegn því skilyrði að hætt yrði að elta hann og myndirnar ekki birtar fyrr en eftir tvo daga, þegar hann mun hverfa af landi brott.  

Bieber hefur tíst því á Twitter að dagurinn hafi verið yndislegur og birti hann einnig af sér myndband á Youtube-rásinni Justin Bieber Videos 2.0 þar sem hann segist staddur hér á landi með ljósmyndaranum og vini sínum Chris Burkard.

Sjá meira: Bieber birtir myndband af sér á klakanum: „Dagurinn í dag er stórkostlegur"

Svo vinsæll er poppsöngvarinn að aðdáendur hans kalla sig gjarnan Beliebers en upphaf þess má rekja til ársins 2010 þegar vinsældir kappans tóku að aukast.

• Justin Drew Bieber er fæddur þann 1. mars árið 1994.

• Hann fæddist í borginni London í Ontario í Kanada og er alinn upp í Stratford í Kanada. Foreldrar hans eru þau Jeremy Jack Bieber og Patricia Mallette og er hann einkabarn foreldra sinna.

• Bieber var uppgötvaður af umboðsmanninum Scooter Braun árið 2007 en Braun rakst á myndbönd sem Bieber hafði hlaðið inn á vefsíðuna Youtube af sér að syngja lagið With You eftir Chris Brown.

• Hann gaf út sína fyrstu smáskífu í nóvember árið 2009 og ber hún nafnið My World.

• Hann hefur nú gefið út þrjár stúdíóplötur. My World 2.0, Under the Mistletoe og Believe.

• Mest streymda myndband Biebers á Youtube er við lagið Baby, sem gefið var út árið 2010 en myndbandinu hefur verið streymt 1.214.181.438 sinnum en lagið gerði hann með rapparanum Ludacris.

• Mest streymda lag Biebers á Spotify er lagið What Do You Mean? en alls hefur það verið spilað 99.984.918 sinnum.

• Bieber hefur einnig verið áberandi í fjölmiðlum vestanhafs fyrir að koma sér í vandræði og í kast við lögin og einnig var talsvert mikið fjallað um haltu-mér-slepptu-mér samband hans við söngkonuna Selenu Gomez á slúðurmiðlunum.

Mads Mikkelsen líka á landinu

Justin Bieber er ekki eina stjarnan sem stödd er á landinu um þessar mundir því danski leikarinn Mads Mikkelsen er einnig á Íslandi.

Sjá meira: Mads Mikkelsen mættur á klakann

Mikkelsen mun vera hér við tökur á nýjustu Star Wars-myndinni, Rouge One. Tökur hafa staðið yfir við Hjörleifshöfða og Hafursey á Mýrdalssandi.

Ekki hefur verið staðfest hvaða hlutverk Mikkelsen fer með í stjörnustríðsmyndinni en margir veðjuðu á að hann færi með hlutverk vonda karlsins. Leikarinn blés þó á þær sögur í viðtali við danska blaðið Ekstra Bladet þar sem hann sagði hlutverkið veigamikið og að karakter hans væri ekki beinlínis vondi kallinn.

Í sama viðtali sagði hann einnig frá því að tökur myndu fara fram á Íslandi og Englandi og myndu standa yfir í um þrjá mánuði.

Leikarinn er sjálfsagt einna þekktastur fyrir hlutverk sitt sem Le Chiffre í James Bond-myndinni Casino Royale en hann hefur einnig leikið Dr. Hannibal Lecter í þáttaseríunum Hannibal og einnig fór hann með hlutverk í tónlistarmyndbandi poppsöngkonunnar Rihanna við lagið Bitch Better Have My Money, sem fékk talsverða athygli.

Talið er að Mads hafi komið fyrir nokkrum dögum og sást hann til dæmis hafa það ansi náðugt á veitingastaðnum Snaps við Þórsgötu í miðborginni í gær.

Verður að segjast að töluvert minni æsingur er í kringum heimsókn þess danska en bandarísku poppstjörnunnar.