Jeep Cherokee fær 707 hestafla Hellcat vél

Orðrómur hefur verið um það lengi að Chrysler fyrirtækið hyggist bjóða Jeep Grand Cherokee með sömu 707 hestafla Hellcat vél og fá má í Dodge Challenger og Charger bílunum.

Það virðist hafa verið staðfest í vikunni og Jeep er þegar búið að smíða eintak af slíkum bíl og til stendur að sýna hann á árlegu ráðstefnu Chrysler bílasala í Las Vegas á næstu dögum. Allar líkur eru því á því að bíllinn verði framleiddur og fái hið langa nafn Jeep Grand Cherokee Trackhawk.

Hann á að vera 3,5 sekúndur í hundraðið og er slíkt fáheyrt meðal jeppa. Hann hefur það framyfir Challenger og Charger að vera fjórhjóladrifinn og heyrst hefur að hann sé sneggri en þeir þrátt fyrir meiri þyngd og ná sprettinum í hundrað á 2,7 sekúndum, en það hljómar harla ólíklegt.

Á þessari árlegu ráðstefni stendur til að kynna marga nýja bíla, svo sem nýjan Jeep Wagoneer, Plug-In-Hybrid Chrysler Town og Country minivan, Dodge Dart GLH og nýjan Ram pallbíl. Auk þess verður nýr Dodge Charger sýndur og á hann að bera útlitseinkenni tilraunabíls frá Dodge sem framleiddur var rétt fyrir síðustu aldamót.