Stærsti driftviðburður ársins í kvöld

Drift er það mótorsport sem stækkar hvað örast í heiminum og ekki af ástæðulausu enda mjög áhorfendavænt. Hraði, reykur, hávaði og spól einkenna sportið en um þessar mundir er það í stórsókn á Íslandi.

Driftdeild AÍH ásamt fleiri aðilum hafa fengið hingað til lands keppnislið í drifti frá Danmörku skipað Íslendingum. Saman eiga þeir feðgar Atli Óðinsson og Óðinn Hauksson fullsmíðaðan keppnisdriftbíl af gerðinni Toyota Supra sem áætluð er um 700 hestöfl. Munu þeir leika listir sínar ásamt flottum hópi íslenskra ökuþóra í kvöld 24. júlí á Rallýkrossbraut Akstursíþróttafélags Hafnarfjarðar.

Svæðið opnar kl 19:00 og mun bílasýning til hliðar við brautarakstur standa yfir allan tímann. Aksturssvæði AÍH-manna er best búna svæði landsins fyrir sportið og er mikið notað af alls kyns keppnistækjum. Veitingasala með léttum veitingum verður á staðnum. Kynnir kvöldsins verður enginn annar en Ólafur Ásgeir útvarpsmaður á FM957. Aðgangseyrir er 1.000 kr. og frítt fyrir 12 ára og yngri.