Hugmynd Volvo um besta barnabílstólinn

Hægt verður að fá svona barnabílstól í nýja Volvo XC90 jeppann. Að sjálfsögðu er hann leðurklæddur eins og önnur sæti bílsins og vafalaust úthugsaður með tilliti til þæginda og öryggis.

Það sem ef til vill er eftirtektarverðast er staðsetning hans ofan á framhallandi farþegasætinu og barnið sér aftur, eins og öruggast er, og getur horft beint í augu móður sinnar. Einnig má snúa stólnum til að vinnuaðstaða foreldranna sé sem best við aðhlynningu barnsins.

Í barnabílsætinu, sem taka má með sér úr bílnum er hólf úr áli sem rúmar bleiurnar, pelana og allt það sem fylgir barninu. Volvo kallar þennan nýja barnabílstól „Excellence Child Seat Concept“ og líklega er það ekki orðum aukið. Það gerist líklega ekki betra fyrir barnið.