Góð veiði í Svarfaðardalsá

Þeir veiðimenn sem vilja eltast við sjóbleikju ættu að finna veiðisvæði við hæfi hjá Stangaveiðifélagi Akureyrar.

Félagið hefur innan sinna vébanda svæði eins og Svarfaðardalsá, Hörgá, Ólafsfjarðará, Öxnadalsá, Hraun í Laxá og Fjarðará. Árnar eru velflestar frábærar silungsár og gengur sjóbleikja í þær allar ásamt því að þar má finna staðbundin silung og víða nokkurn sjóbirting. Svarfaðardalsá hefur til að mynda gefið góða veiði en samkvæmt fréttum frá SVAK var veiðimaður á ferð í ánni fyrir 2 vikum síðan sem gerði feyknagóða veiði en samtals náði hann 31 fisk, 30 sjóbirtingum og einni bleikju.

Besti tíminn í sjóbleikjuna er jafnan frá byrjun júlí og fram í ágúst og getur bleikjan þá jafnan gengið inn í árnar í stórum torfum. Þeir sem vilja skoða framboð veiðileyfa hjá Stangaveiðifélagi Akureyrar geta fundið laus leyfi á síðunni þeirra en hana má finna hér.