Subaru Impreza með tvíorkuaflrás

Subaru hefur fram að þessu ekki boðið margar bílgerðir sínar með tvíorkuaflrás. Sá fyrsti þeirrar gerðar var Subaru XV Crosstrek og nú hefur Subaru bætt við Impreza fólksbílnum í þá stækkandi flóru.

Subaru Impreza Plug-In-Hybrid verður í fyrstu eingöngu í boði í heimalandinu Japan en búast má við því að ekki þurfi lengi að bíða eftir bílnum á öðrum mörkuðum. Bíllinn er með 2,0 lítra boxervél og rafmótorum og er sagður skila 160 hestöflum til allra hjólanna.

Eyðsla bílsins er uppgefin 4,9 lítrar á hverja hundrað kílómetra. Verð Impreza Plug-In-Hybrid í Japan er aðeins 2,5 milljónir króna. Hinn háþróaði Eyesight öryggisbúnaður er nú í öllum gerðum Impreza en þessi búnaður var fyrst kynntur í Outback bílnum.