Spennandi toppbarátta fyrir lokahringinn á Players

Bandaríkjamaðurinn Chris Kirk leiðir fyrir lokahringinn á Players meistaramótinu en hann er á tíu höggum undir pari eftir hringina þrjá á TPC Sawgrass vellinum.

Hann má þó búast við mikilli samkeppni á lokahringnum en 30 kylfingar eru innan við fimm höggum frá forystusætinu og meðal þeirra eru margir af bestu kylfingum heims.

Bandaríkjamennirnir Kevin Kisner, Ben Martin og Bill Haas deila öðru sætinu á níu höggum undir en margir koma á átta höggum undir, meðal annars Spánverjinn Sergio Garcia sem spilaði frábærlega í gær og kom inn á 67 höggum eða fimm undir.

Það toppaði þó enginn frammistöðu nýliðans Justin Thomas en hann setti mótsmet yfir flesta fugla á hring á hinum krefjandi TPC Sawgrass velli. Hann lék þriðja hring á 65 höggum eða sjö undir pari en hann fékk tíu fugla á hringnum og gæti með svipaðri frammistöðu í dag gert atlögu að sigrinum.

Tiger Woods þurfti á góðum hring að halda til að blanda sér í baráttu efstu manna í gær en það gekk nákvæmlega ekkert upp hjá honum. Hann fékk tvo tvöfalda skolla á hringnum og aðeins tvo fugla en hann kom inn á 75 höggum eða þremur yfir pari og er jafn í 68. sæti.

Þá má ekki gleyma besta kylfingi heims, Rory McIlroy, en hann hefur leikið ágætlega hingað til og er á sex höggum undir pari, fjórum á eftir efsta manni fyrir lokahringinn.

Bein útsending á Golfstöðinni hefst klukkan 17:00 í kvöld.