Bílar

Suzuki Vitara fékk 5 stjörnur í öryggisprófunum

Finnur Thorlacius skrifar
Suzuki Vitara af nýrri kynslóð kemur í sölu hér á landi með haustinu.
Suzuki Vitara af nýrri kynslóð kemur í sölu hér á landi með haustinu.
Suzuki Vitara er fyrsti jepplingurinn sem fær fullt hús stiga, 5 stjörnur, í árekstrarprófun Euro NCAP á þessu ári. Niðurstöðurnar voru ótvíræðar á öllum sviðum prófunarinnar og þær setja nýjan Vitara á stall yfir öruggustu bílana í þessu flokki.

Suzuki Vitara fékk hæstu einkunn í öllum fjórum helstu prófunarþáttunum, þ.e. öryggi farþega, öryggi barnungra farþega, öryggi annarra vegfarenda og akstursstoðkerfi sem stuðla að auknu öryggi. Kröfurnar sem þarf að uppfylla á þessu sviði eru strangari en nokkru sinni áður.

Fimm stjörnur eru hámarkseinkunn og einungis þau ökutæki sem uppfylla hámarksvörn fyrir farþega og vegfarendur hljóta hana. Einn helsti öryggisþátturinn í nýjum Vitara er svokallað „Total Effective Control Technology“ sem felur í sér samspil aflögunarsvæðis fyrir farþegarými og léttleika öktækisins.

Mikil notkun á hástyrktarstáli í yfirbyggingu Vitara og tölvuvædd verkfræðiútfærsla í hönnun stuðla einmitt að framúrskarandi gildum á þessu sviði. Vitara kemur m.a. með sjö öryggispúðum.

Prófanir Euro NCAP, sem er leiðandi stofnun í Evrópu á sviði öryggismála ökutækja, leiðir í ljós að hönnun framsæta og hnakkapúða veita fyrirtaks vernd gegn hálshnykkjum við aftanákeyrslur.Nýr Suzuki Vitara er væntanlegur á markað á Íslandi með haustinu.

Mest lesið




×

Mest lesið