Peugeot 308 R Hybrid er 500 hestöfl

Nokkrir mjög öflugir tengitvinnbílar eru nú framleiddir, en allir eiga það sammerkt að vera svo dýrir að almenningur hefur ekki ráð á þeim. Er þá átt við bíla eins og Porsche 918, McLaren P1, Ferrari LaFerrari og BMW i8.

Sá síðastnefndi er þó þeirra langódýrastur, en kostar samt 135.000 dollara. Það skildi þó ekki vera Peugeot sem fyrst allra bílaframleiðenda smíðar mjög öflugan tengiltvinnbíl sem almenningur hefur ráð á. Það gæti orðið í formi þessa Peugeot 308 R Hybrid bíls sem Peugeot sýndi nýlega.

Peugeot 308 R Hybrid er með 270 hestafla bensínsvél og rafmótora sem skila 115 hestöflum að jafnaði, en með „Hot Lap“-stillingu má kreista meira afl útúr þeim og er þá heilkdarhestaflafjöldinn orðinn 500. Það dugar til að koma bílnum í 100 km hraða á 4 sekúndum.

Peugeot hefur ekki enn gefið upp hvort að fjöldaframleiðslu á þessum bíl verður, né heldur á hvaða verði hann yrði þá seldur. Þeir sem fjallað hafa um bílinn hafi giskað á að verð hans yrði á bilinu 50 til 60 þúsund dollarar, eða 6,8-8,1 milljónir króna. Það er nokkru viðráðanlegra verð en á ofantöldu bílunum.