Sjöundi bíll Porsche á leiðinni

Porsche framleiðir í dag Cayenne, Macan, Panamera, Boxster/Cayman, 911 og 918 Spyder bílana. Haft var eftir forráðamönnum Porsche í gær að stutt væri í að Porsche kynnti sjönda bíl sinn, en án þess að láta nokkuð uppi um hvernig sá bíll kemur til með að vera.

Ýmsar getgátur eru að sjálfsögðu uppi. Sumir vilja meina að um sé að ræða hreinræktaðan rafmagnsbíl, aðrir Shooting Brake útgáfu af Panamera bílnum og enn aðrir að það verði bíll sem brúar verðbilið milli Porsche 911 Turbo S og 918 Spyder, bíll sem ætti að keppa við Ferrari bíla.

Porsche fyrirtækinu gengur ógnarvel þessa dagana og hagnaðist sem aldrei fyrr í fyrra og seldi fleiri bíla en nokkru sinni, eða 189.849 bíla. Porsche ætlar að selja yfir 200.000 bíla í ár og væntir mjög vaxandi sölu í Kína og Bandaríkjunum, auk þess sem í ár er fyrsta heila árið sem Macan er í sölu, en hann var kynntur til leiks í apríl í fyrra.

Porsche seldi 34% fleiri bíla í febrúar í ár en í fyrra og byrjar árið frábærlega. Eftirspurn eftir lúxusbílum í heiminum fer nú stórvaxandi og gott gengi þeirra allra í fyrra er til vitnis um það.