„Í afneitun um hvað þetta er glatað ástand“

Veðrið hefur ekki beint leikið við landsmenn nú um helgina, en Veðurstofan hefur gefið út aðra stormviðvörun þar sem búist er við meira en 20 metrum á sekúndu sunnanlands síðdegisog víðar um land í nótt og fram á mánudagsmorgun.

Lífið á Vísi fór á stúfana og grennslaðist fyrir um hvað fólk hefði fyrir stafni í óveðrinu.

Í afneitun

Árni Vilhjálmsson úr hljómsveitinni FM Belfast sagðist hanga mikið á Twitter.

„Ég reyni að tala sem minnst um veðrið og fer í afneitun um hvað þetta er glatað ástand.

Auk þess sem ég tékka reglulega á því hvort veðrið sé nokkuð of slæmt fyrir pizzusendla Domino's."

Þægileg innivinna

Valgerður Bjarnadóttir, alþingiskona, segist heppin að hafa innivinnu í svona veðri.

„Ég er nú svo heppin að vera í þægilegri innivinnu, svo veðrið hefur ekki mikil áhrif á það,“ segir þingkonan.

„Ef veðrið verður mjög slæmt finnst mér nú samt best og öruggast að breiða sængina upp yfir haus."

Byggði virki og drakk kakó

Þórir Sæmundsson, leikari reyndi fyrir sér á Twitter.

„Ég byggði virki úr koddum, sængum og dýnum. Drakk kakó, horfði á Toy Story og hlustaði á fréttir.

Svo las ég Twitter, horfði út um gluggann og reyndi að láta mér detta í hug fyndin tíst með kassmerkinu #lægðin. Gekk miðlungs vel."

Kökubakstur og mótmæli

Steinunn Jónsdóttir, meðlimur hljómsveitarinnar Amaba Dama fór að mótmæla.

„Í gær var ég heima að kubba og baka köku.Í dag fagnaði ég lægðarleysinu og fór í sund með soninn og að mótmæla á Austurvelli."

Steinunn var ekki sú eina sem mætti á Austurvöll en talið er að nokkur þúsund manns hafi mótmælt eins og sjá má hér.