Opel rifar seglin í Rússlandi

General Motors, eigandi Opel, hefur fengið leið á því að tapa ógrynni fjár í Evrópu. Ástandið í Rússlandi er ekki beint til að hjálpa til við þau áform að rétta við skútuna í álfunni og því hefur verið tekin sú ákvörðu að loka verksmiðjum Opel í Rússlandi við lok þessa árs.

Áhersla GM í Rússlandi verður á dýrari gerðir Chevrolet og Cadillac bíla, en framleiðslu minni og ódýrari bíla hætt. Því verða þeir bílar sem GM selur í Rússlandi innfluttir, en víst er að framleiðsla þeirra í Rússlandi hefur ekki borgað sig í samkeppni við aðra ódýrari bíla þar.

Markmið Opel var að ná yfir núllið í Evrópu frá og með árinu 2016 og það rýmar ekki við þær áætlanir að halda úti óbreyttri starfsemi í svo óvissu ástandi sem er í Rússlandi nú og verður líklega á næstu árum.

Fyrir stuttu var hér greint frá tímabundnum lokunum bílaverksmiðju Nissan í Rússlandi og svo virðist sem allir bílaframleiðendur séu að rifa seglin í Rússlandi eða minnka starfsemi sína til muna þar.