Tesla stefnir að 70% söluaukningu í ár

Fáir bílaframleiðendu spá fyrir um 70% aukningu í sölu bíla sinna fyrir þetta ár, en það gerir bandaríski rafmagnsbílaframleiðandinn Tesla. Í fyrra seldi Tesla um 32.000 bíla en ætlar að selja 55.000 í ár.

Tesla mun kynna Model X jeppling sinn á þessu ári og fyrirtækið hefur þegar fengið 20.000 pantanir í bílinn. Við upphaf þessa árs hafði Tesla að auki fengið 10.000 pantanir í Tesla Model S bíl sinn, svo pantanir liggja fyrir í ekki ósvipaðan fjölda bíla í ár og Tesla seldi allt árið í fyrra.

Tesla ætlar þó ekki að láta nægja að auka framleiðslu sína stórlega í ár heldur ætlar það einnig að fjárfesta mikið í hleðslustöðvaneti sínu víða um heiminn, útsölustöðum og þjónustustöðum. Auk þess fer mikið fé í þróun Model 3 bílsins, svo eyðsla fjár hjá Tesla verður gríðarlegt á árinu og haft hefur verið eftir Elon Musk, forstjóra Tesla að fjárfesting fyrirtækisins verði stjarnfræðileg í ár.

Tesla er einnig að byggja risarafhlöðuverksmiðju fyrir utan borgina Reno í Nevada fylki og er það mjög fjárfrek framkvæmd. Öll þessi uppbygging Tesla, bæði undanfarið og á næstu árum er ávísun á taprekstur þó bílasalan sé ágæt. Í fyrra nam tap Tesla 39 milljörðum króna, en árið 2013 var tapið 10 milljarðar króna.

Velta Tesla var 425 milljarðar króna í fyrra og jókst mjög frá árinu áður er hún var 265 milljarðar og aðeins 55 milljarðar árið 2012. Í ár stefnir í um 800 milljarða króna veltu hjá Tesla og er það lýsandi fyrir gríðarlegan vöxt Tesla.